100ରୁ ଅଧିକ ପ୍ରୋଜେକ୍ଟ ଓ 35,000 ଉତ୍ପାଦର ଭବ୍ୟ ପ୍ରଦର୍ଶନ
ଭୁବନେଶ୍ୱର, (ନିପ୍ର) : ଇଣ୍ଡିଆ ଇଣ୍ଟରନ୍ୟାଶନାଲ୍ ମେଗା ଟ୍ରେଡ୍ ଫେୟାର ଓ ହୋମ୍ ଏଣ୍ଡ ଡେକୋର ଏକ୍ସପୋର ଭବ୍ୟ ଉଦଘାଟନ ଶୁକ୍ରବାର ହୋଇଛି। ଏହି ଏକ୍ସପୋର ଉଦଘାଟନ ଗୃହ ଓ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର କରିଥିଲେ।
ଏହି ଅବସରରେ ବିଧାୟକ ବାବୁ ସିଂହ, ବିଧାୟକ ଆଶ୍ରିତ ପଟ୍ଟନାୟକ ସହିତ ଅନେକ ଜନପ୍ରତିନିଧି ଓ ଶିଳ୍ପ ଜଗତର ପ୍ରମୁଖ ବ୍ୟକ୍ତିମାନେ ଉପସ୍ଥିତ ଥିଲେ। ଏହି ଆୟୋଜନର ଉଦ୍ଦେଶ୍ୟ ହେଉଛି ରିଏଲ୍ ଏଷ୍ଟେଟ୍, ନିର୍ମାଣ ସାମଗ୍ରୀ, ବ୍ୟାଙ୍କିଙ୍ଗ ଓ ଲାଇଫ୍ଷ୍ଟାଇଲ୍ ସେକ୍ଟରକୁ ଗୋଟିଏ ମଞ୍ଚରେ ଆଣିବା।
ଓଡିଶା ଡେଭେଲପର୍ସ ଫେଡେରେସନ୍ର ଅଧ୍ୟକ୍ଷ ପ୍ରଦୀପ୍ତ କୁମାର ବିଶ୍ୱାସରାୟ କହିଥିଲେ ଯେ, ଏହି ଏକ୍ସପୋ ଉପଭୋକ୍ତାମାନଙ୍କୁ ସଚେତନ କରିବା ସହ ସଠିକ୍ ସିଦ୍ଧାନ୍ତ ନେବାରେ ସହାୟତା କରିବ। ସେ ସରକାରଙ୍କୁ ଅନୁରୋଧ କରିଥିଲେ ଯେ ଭୂମି ବ୍ୟବହାର ଅନୁମୋଦନ ପ୍ରକ୍ରିୟାକୁ ସରଳ କରାଯାଉ, ଯାହାଦ୍ୱାରା ନିବେଶ ଓ ବିକାଶକୁ ଗତି ମିଳିପାରିବ।
ସେଥିପାଇଁ ଭୁବନେଶ୍ୱର, କଟକ ଓ ବ୍ରହ୍ମପୁରରେ ବଢୁଥିବା ଟ୍ରାଫିକ୍ ଓ ସହରୀୟ ସମସ୍ୟାମାନଙ୍କ ଉପରେ ମଧ୍ୟ ଧ୍ୟାନ ଦେବା ଆବଶ୍ୟକ ବୋଲି ସେ କହିଥିଲେ।
ଏହି ମେଳାରେ 40ରୁ ଅଧିକ ରିଏଲ୍ ଏଷ୍ଟେଟ୍ କମ୍ପାନୀ ଅଂଶଗ୍ରହଣ କରୁଛନ୍ତି, ଯେଉଁମାନେ 100ରୁ ଅଧିକ ପ୍ରୋଜେକ୍ଟ ପ୍ରଦର୍ଶନ କରୁଛନ୍ତି। ସେଥିସହ 5ଟି ଦେଶ ଓ 12ଟି ରାଜ୍ୟର 35,000ରୁ ଅଧିକ ଉତ୍ପାଦ ମଧ୍ୟ ପ୍ରଦର୍ଶିତ ହେଉଛି।
ମେଳାରେ ବ୍ୟାଙ୍କ ଓ ହାଉସିଙ୍ଗ ଫାଇନାନ୍ସ କମ୍ପାନୀମାନେ ହୋମ୍ ଲୋନ୍ ସହାୟତା ଡେସ୍କ ମାଧ୍ୟମରେ ତତ୍କ୍ଷଣାତ୍ ଋଣ ପରାମର୍ଶ, ବିସ୍ତୃତ ସୂଚନା ଓ ପ୍ରାରମ୍ଭିକ ଅନୁମୋଦନ ମଧ୍ୟ ଦେଉଛନ୍ତି।
ଏହି ଏକ୍ସପୋ 27 ମାର୍ଚ୍ଚରୁ 4 ଏପ୍ରିଲ୍ ପର୍ଯ୍ୟନ୍ତ ଦିନ 1ଟାରୁ ରାତି 9ଟା ପର୍ଯ୍ୟନ୍ତ ଖୋଲା ରହିବ। ପ୍ରବେଶ ଶୁଳ୍କ 40 ଟଙ୍କା ରଖାଯାଇଛି। ଆୟୋଜକମାନେ ଆଶା କରୁଛନ୍ତି ଯେ, ଏହି ସମୟ ମଧ୍ୟରେ 3 ଲକ୍ଷରୁ ଅଧିକ ଲୋକ ମେଳାକୁ ଦେଖିବାକୁ ଆସିବେ।