ଭୁବନେଶ୍ୱର, ( ନିପ୍ର) : ବିରୋଧୀ ଦଳ ଶିବିରରେ କେବଳ ଗୋଟିଏ ଆଶଙ୍କା-ଘୋଡ଼ା ବେପାର, କ୍ରସ ଭୋଟିଂ । ଅପରପକ୍ଷରେ ୩ଟି ଯାକ ଆସନରେ ଜିତାପଟ ପାଇଁ ବିଜେପି ରଣନୀତି ଚଳାଇଛି । ଦଳର ବରିଷ୍ଠ ନେତୃମଣ୍ଡଳୀ ଘନଘନ ବୈଠକ କରୁଥିବା ସୂଚନା ମିଳିଛି । ନବୀନ ନିବାସରେ ମଧ୍ୟ ବିଜେଡି ବିଧାୟକଙ୍କ ବୈଠକ ହେଉଛି। ମହାପ୍ରସାଦ ଛୁଆଁଇ ଶପଥ ପାଠ କରାଯାଉଛି। ପ୍ରଥମ ଦିନ ବୈଠକକୁ ୬ ବିଧାୟକ ଆସି ନ ଥିଲେ । ମିଳିଥିବା ସୂଚନା ଅନୁଯାୟୀ ବିଧାୟକ ସୌଭିକ ବିଶ୍ୱାଳ, ନବ ମଲ୍ଲିକ, ସୁଦର୍ଶନ ହରିପାଲ, ଶାରଦା ନାୟକ, ମନୋହର ରାନ୍ଧାରୀ ଓ ଚକ୍ରମଣି କହଁର ଅନୁପସ୍ଥିତ ଥିଲେ । ସୌଭିକଙ୍କୁ ନେଇ ପ୍ରଥମରୁ ଦଳ ସନ୍ଦେହରେ ରହିଛି ।
ବାକି ୫ଜଣଙ୍କ ଅନୁପସ୍ଥିତି ନେଇ ଭିନ୍ନ ଭିନ୍ନ କଥା ଶୁଣିବାକୁ ମିଳୁଛି । ଦଳ ପକ୍ଷରୁ କୁହାଯାଉଛି, ମନୋହରଙ୍କୁ ଜ୍ୱର ଓ ଶାରଦା ବାଟରେ ଅଛନ୍ତି । ଶନିବାର ସମସ୍ତେ ଆସିବେ । ଭାଜପା ନେତା ରବୀନ୍ଦ୍ର ଜେନାଙ୍କ ପତ୍ନୀ ବସ୍ତା ବିଧାୟିକା ସୁବାସିନୀ ବୈଠକ ପରଦିନ ଅର୍ଥାତ୍ ଶୁକ୍ରବାର ନବୀନ ନିବାସ ପହଞ୍ଚିଥିଲେ । ସମସ୍ତ ବିଧାୟକଙ୍କୁ ଏକାଠି କରିବା ପାଇଁ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଝାଳନାଳ ହୋଇ ଯାଉଛନ୍ତି। ନବୀନଙ୍କ ବୋଫାଦର୍ କେତେଜଣ ଦଳୀୟ ହୁଇପକୁ ମାନୁଛନ୍ତି ତାହା ଆସନ୍ତା ୧୬ ତାରିଖ ନିର୍ବାଚନ ବେଳେ ଜନ ପଡ଼ିବ।